WANKAWILLKA WARMIKUNAQA KALLPACHAKUCHKANKUM


Qayna watam (iskay waranqa chunka pusaqniyuqpi), huk watakunahina kutirqani Lirkay llaqtaman, anqarakunapa willakuynin aswan allin riqsiq. Lirkaymantam qispirqani Pitin-Pata anexo nisqaman, hinaspaymi samapakurqani Hanampa-De la Cruz ayllupa wasinpi. Chaypim wasiyuqniy mama Carolina De la Cruz pusawarqa Pitin-Pata warmikuna aswan ñawiyuq purinankupaq llamkayman. Chay programatam purichichkanku Fundación Strommewan Tierra de niños nisqa.
   Uña warmachakunapa yachaywasinman chayaykuspayqa tarirqani achka warmikunata. Paykunam sapapunchaw llamkasqankumanta samaykuspa, uña wawachankuta qipirikuspa aysarikuspa chisinkuytaña risqaku warmikuna kallpachaq programapi ñawinku aswan allin kichariq. Risqay tutaqa llamkarqaku Administración Pública papilninkunapi (formulario nisqanchikpi) allin qillqayta. Promotora Norma Torres Curum kastillasimipi likarqa administración papilkunata, yachakuq warmikunañataqmi umacharqaku, rimanakurqaku tapunakurqakupas runasimillapi. Promotoraqa wakin tapukuytapas runasimipitaqmi kutichirqa. Chayna llamkay qawaykuyqa kusirikuypaqpunim karqa.
     Chaymantam promotorawan rimaykurqani hinaptinmi ‘Kay programaqa tukuchkanñam. Kay llaqtapi warmikunawanqa qayna watamantaraqmi llamkachkaniku. Kay programa qallariyninpiqa llamkarqaniku runasimipi alfabetización nisqatam; chaypaqmi Fundación Strommewan Tierra de niños nisqa paqarichirqaku runasimipi libruchakunata. Kay warmikunaqa yachankuñam runasimipi liyiyta, warmachakunapas yachachkankuñam’ yaqa chaynatam niwarqa. Chaymantaqa Pitin-Patamanta Lirkayman uraykamuspaymi rirqani, Proyecto Tierra de Niños purichiqkuna riqsiq, paykunapa wasinpim riqsiykurqani mama Alicia Trañez Candiotita, hinaspam llamkayninkumanta rimaykurqaniku. Chaypim riqsiykachiwarqa wawakunapaq runasimipi librukuna paqarichisqankutapas, wawakuna chay librukunawan imayna llamkasqankumantapas.
  Kayna llamkaykunaqa qawachiwachkanchik Wankawillka warmikuna, qarikuna, wawakunapas runasimi rimaq kasqankuta. Chaymi llapallan awtoridadkunapas kayhina programakunata purichinmanku, runa kayninchik sumaq kallpachasqa qispinanpaq. Allintaqmi llaqtanchikpi runasimi rimaqkunata yuyarispa runasimipi libruchakuna paqarichiypas. Kayna purikuspaqa tukuytam qawanchik, riqsinchikpas wakinmi llakichikun wakinñataqmi kusirichikun anqara warmikunapa llankayninkuhina. Kay pisi qillqawan paykunata “Chunkulláy!” nini.


                                                                                       Pablo Landeo, 2018 watapa marsu killanpi











Comentarios

Entradas populares