Tullpa, Chuklla

Tullpa

Mamaypa wakcha tullpanmi
Tukuy uchku mankankunawan
Yarqayta warakaspa
Sumaq mikuyninta
Chuñu pasichantawan
Qaraykuwarqa
Hinaptinmi sunquchallay takiykuspa
Tusukuykurqa sarapa sunquchanpi.

Chuklla

Chiri urqupa sunqunpim
Suma-sumaq chukllacha
Waytarispa puyuhina
Sumaqchallata aytuykuwan.
Ichu makichanwan
Tullpanpa millqayninpi
Kay sumaq chukllachaqa
Wañuymanta qichuykuwaspan
Sunquchanpi puñuchiwan
Chiri wayra mana apakuwananpaq.
Chaynam kay suma-sumaq chukllachaqa.
Imaynaraq kawsallayman
Chiri urqupa sunqunpi
Mana kusikuyninwan aytuykuwaptin
Allinta qawakuykuptiyqa
Ñuqapa sunquymi suma-sumaq chukllacha.

Juan Luis Espinoza Chinchon

Aurahuá llaqtapi paqarirqa. Kay uña llaqtacham Castrovirreynapa ukunpi wiñan. Iskaynin llaqtakunañataqmi Wanka Willka sunqunpi kawsayta wiñachinku. Amawta Juan Luisqa qillqani sumaq willakuychakunata chaymantañataqmi ruwan harawikunatapas. Harawi qillqasqanmi sumaq waytachahina waytarin. Paymi kwintukuna hatun llallinakuypi "Wañuypa qipanpi" kwintunwan llallirqa. Kay llallinakuytaqa riwista Atuqpa chupanmi purichirqa 2020-2021 watapi.