Killapa sapin, Wiqiypa llakin

Killapa sapin

Wankawillkapi pararqa,
qam manam imananchu nirqanki.
Patalla pawaykuy qasapi,
chaskakunam ñawiyki karqa.

Kuskanchikmi saywata sayarichirqanchik,
ichaqa ichullayá waytarurqa.
Rimayniki karuyarqurqa,
chiripi quena llaki waqaqhina.

Kantutaqa manam waytamurqañachu,
punchawpas mana achikyayniyuqña.
Killapas mana kanchayniyuqñam,
qawayniykipas killapa llantunhina chinkaqlla.

Wiqiypa llakin

Wayrapas achikyayman takipun,
qamñataq chaskaman tusupunki.
Rumisunqutaq kapunki,
mana suyaq lluqllataq kapunki.

Tuta punchaw kanchaq killata qurqayki,
qamtaq, usyay wayrata quwarqanki.
Lasta parapi wayta waytaqta qurqayki,
mana sapiyuq waytataq kasqanki.

Llapa kuyayniytataq qurqayki,
kuyayqa mana ñanniyuq llaki kasqa.
Umpa clavel waytatahina qawarqayki,
qamqa anku kichkatahina qawawarqanki.

Thalia Flores Astopillo

Wankawillka – Chinchiwasina warmi. Runasimi huk simikunapas tikraqmi, chaynallataq yachachiq, qillqaqpas. Payqa taytamamakuna allin kawsayninpi, wawakunapa yachapakuyninpi iskay simipi kawsay imaymana ruraypipas yanapakurqa. Qillqasqanpiqa yuyay, kuyay warmi kay, kawsay pachapas rikurimunku. Harawikunawanmi ñawpaq runakunapa siminta waqaychan qipa wiñaykunaman chayananpaq. Kunanpas runasimi yachachispa, tikraspa hinallataq chiqirichispapas llamkan.