Mamaypa llikllan, Qhichwam kani

Chay khutu chirimanta amachasqa
Wawallaraq kachkaqtiymi
Chaynatan mamitay q’ipiwarqan
Munakuyninwan mat’i k’irusqallataña.

Away llikllanpi p’istusqa
Ch'uya, k’umpi willmamanta
Mayo killapi tukusqa
Paywan, hatun mamaywan awasqankupi.

Kunan warmiyaruqtiytaq
K’ahachikuq qasaq hinch’ayninpihina kani
Qayna p’unchawkunata yuyarispa
Mana ñak’arisqaykunata watukuspay.

Ichaqa ch’ilan kani imapaqpas
Kay muchuy pachakunapi
Sayk'usqaqa kasaqmi
Pantasqankun sunquyta k’irinqa
Khichkahinan wasanchaykunapas kawanqa
Kallpa churasqay mana qhawarisqakunaman urmaykusaq
Nanaypas ñawiykunataqa ruphanqaraq.

Q’illu ñawinkupas riqsikuyninku kaqtin
Nisaqmi: Ama chachanayaychu nispa
Sunqu churakusqaymi kallpay kanqa
Chayta q’ipispayqa churapakusaqmi
Kawsaypi tukuy imapas ukhuriqtin
Mamaypa llikllanpi p’istusqa karqani hina
Chay pipu pallay awaypi

T’ikariq takiq kani,
Guitarrapa sunqunpi,
Ichapas mama simikuna
mana chinkananrayku takiq.

Qhichwa muhun kani,
Pachamamapi tarpusqa,
Wiñaypaq chakra ruwasqapi p’uturiq,
Imayna hatun tayta mamakuna quri sarata qarpankumanhinaraq.

Pachapa raprachasqan takiq kani,
Sapallay mana ima aparisqa,
Ankapa qasqun ukhupi
Mana hayk’aq iskayaq.

Qhichwa simipi chhichiq mama mayun kani,
Unayniyuq mama unuq kunkan,
Sapa phawchiypi mamaq solaynin
Qhatu panpapi asiymanta wañuq.

Ankallikuq apun kani,
Parlasqaypas saminchanapaq rumihina,
Awaqmi kani,
Huch’uymanta hatunman hukllachiq.

Nisqayqa kankakuqmi
mana tatiyaq kallpa
imaraykuchus qhichwa simiypiqa
Kay pacha paqariyqa phallcharinraq.